Plantun de Prouvènço

Pèr coumpara dos planto d'encò nostre

Pulicaria vulgaris & Scleranthus annuus

Pulicaria vulgaris

Asteraceae Compositae

Noms en français : Pulicaire commune , Herbe de saint Roch.

Descripcioun :
L'erbo-di-niero es uno planto que trachis dins li mueio e qu'èi devengudo proun raro. Sèmblo à l'erbo-de-Sant-Ro, Pulicaria dysenterica, en pu pichoto, mai emé mai de flour (coumpausado). Au contro qu'aquesto darriero qu'èi renadivo, es uno planto de l'an.

Usanço :
L'erbo-di-niero sèr desempièi proun de tèms à tua la tavaniho. Lou noum latin Pulicaria vèn de pulex, niero. Theodorus Priscianus, mege dóu siècle IVen, ié dis Pulicularia herba (dins Rerum medicarum libri IV). Mai coume es uno planto proutegido sara pas trop poussible de l'acampa.

Port : Erbo
Taio : 5 à 40 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Pulicaria
Famiho : Asteraceae
Famiho classico : Compositae
Tribu : Inuleae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Estiéu - Autouno

Sòu : Si
Autour basso e auto : 0
Aparado : Noun
Remarco : Meno aparado

Liò : Mueio - Ribiero
Estànci : Mesoumediterran
Couroulougi : Paleoutemperado
Ref. sc. : Pulicaria vulgaris Gaertn., 1791

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.